ബിഹാര്‍ ധമാര റെയില്‍വേ സ്റ്റേഷനില്‍ തീവണ്ടി പാഞ്ഞു കയറി മരിച്ചവരുടെ എണ്ണം 35 ആയി.
By smug - Monday, 19 August 2013
പട്ന: ബിഹാര്‍ ഖഗാറിയ ജില്ലയിലെ ധമാര റെയില്‍വേ സ്റ്റേഷനില്‍ തീവണ്ടി പാഞ്ഞു കയറി മരിച്ചവരുടെ എണ്ണം 35 ആയി. മരിച്ചവരില്‍ കൂടുതലും സ്ത്രീകളും കുട്ടികളുമാണ്. 40ഓളം പേരെ പരിക്കുകളോടെ ആശുപത്രിയില്‍ പ്രവേശിപ്പിച്ചു. മരണസംഖ്യ ഇനിയും ഉയര്‍ന്നേക്കുമെന്നാണ് സൂചന. സഹര്‍സയില്‍ നിന്നും പട്നയിലേക്ക് പോകുകയായിരുന്ന രാജ്യറാണി എക്സ്പ്രസാണ് ആളുകളെ ഇടിച്ചിട്ടത്. പ്രകോപിതരായ പ്രദേശവാസികള്‍ എഞ്ചിന്‍ ഡ്രൈവറെ മര്‍ദ്ദിക്കുകയും രണ്ട് തീവണ്ടികള്‍ക്ക് തീയിടുകയും ചെയ്തു.
തിങ്കളാഴ്ച രാവിലെയാണ് സംഭവം. ഒരു പാസഞ്ചര്‍ ട്രെയിനില്‍ സ്റ്റേഷനില്‍ വന്നിറങ്ങിയ യാത്രക്കാര്‍ റെയില്‍ പാളം മുറിച്ചു കടക്കവെ വേഗത്തില്‍ വന്ന രാജ്യറാണി എക്സ്പ്രസ് ആളുകളെ ഇടിക്കുകയായിരുന്നു. രാജ്യറാണി എക്സ്പ്രസിന് ഈ സ്റ്റേഷനില്‍ സ്റ്റോപ്പില്ലാത്തിനാല്‍ വേഗതയിലായിരുന്നു തീവണ്ടിയുടെ വരവ്. പ്രദേശത്തെ പ്രമുഖ ക്ഷേത്രത്തിലേക്ക് വന്ന തീര്‍ഥാടകരാണ് അപകടത്തില്‍പെട്ടവരില്‍ കൂടുതലും.
തീവണ്ടി സ്റ്റേഷനിലേക്ക് വരുന്നതായുള്ള സിഗ്നല്‍ നല്‍കാത്തതാണ് അപകട കാരണമെന്നാരോപിച്ച് പ്രകോപിതരായ പ്രദേശവാസികള്‍ സ്റ്റേഷനിലുണ്ടായിരുന്ന റെയില്‍വേ അധികൃതരെ കൈയേറ്റം ചെയ്തു. സംഘര്‍ഷത്തെ തുടര്‍ന്ന് ഇതുവഴി പട്നയിലേക്കുള്ള തീവണ്ടി ഗതാഗതം നിര്‍ത്തിവെച്ചിരിക്കുകയാണ്.
Follow our blog on Twitter, become a fan on Facebook. Stay updated via RSS