സിറിയയില്‍ സൈന്യത്തിന്റെ വിഷവാതക ആക്രമണം; ആയിരത്തിലേറെ മരണം
By smug - Wednesday, 21 August 2013
പ്രക്ഷോഭകാരികളെ ഒഴിപ്പിക്കാന്‍ സൈന്യം തുടര്‍ച്ചയായി നടത്തിയ ബോംബാക്രമണത്തിലും മറ്റും സ്ത്രീകളും കുട്ടികളുമുള്‍പ്പെടെ 1000ലധികം പേര്‍ കൊല്ലപ്പെട്ടതായാണ് പ്രതിപക്ഷ സഖ്യം പറയുന്നത്. 1300 പേരെങ്കിലും കൊല്ലപ്പെട്ടതായി സിറിയന്‍ നാഷണല്‍ കൗണ്‍സില്‍ നേതാവ് ജോര്‍ജ് സബ്ര പറഞ്ഞു. അതേസമയം, ബോംബാക്രമണത്തില്‍ എത്രപേര്‍ കൊല്ലപ്പെട്ടുവെന്നും വിഷവാതക ആക്രമണത്തില്‍ കൊല്ലപ്പെട്ടവരെത്രയെന്നും വ്യക്തമായിട്ടില്ല. ഒരു ക്ളിനിക്കിന്‍െറ തറയില്‍ കുട്ടികളുടേതുള്‍പ്പെടെ പരിക്കുകളില്ലാത്ത നൂറുകണക്കിന് മൃതദേഹങ്ങള്‍ കിടക്കുന്നതിന്‍െറ ചിത്രങ്ങള്‍ പുറത്തുവന്നു. മിക്കവരിലും, പ്രത്യേകിച്ച് കുട്ടികളില്‍ കണ്ട മുഖ്യ ലക്ഷണങ്ങള്‍ ശ്വാസ തടസ്സവും മങ്ങിയ കാഴ്ചയുമാണെന്ന് ചികില്‍സിക്കുന്ന ഡോക്ടര്‍ ബി.ബി.സിയോട് പറഞ്ഞു. സരിന്‍ എന്ന വിഷവാതകമാണ് ഉപയോഗിച്ചതെന്നും സംശയിക്കുന്നു.
ഇര്‍ബിന്‍, ദൂമ തുടങ്ങിയ സ്ഥലങ്ങളിലും മരണങ്ങളുണ്ടായതായി റിപ്പോര്‍ട്ടുണ്ട്. താല്‍ക്കാലികമായി കെട്ടിയുണ്ടാക്കിയ ആശുപത്രികളില്‍ നിരവധി പേരെ ചികില്‍സിക്കുന്ന ദൃശ്യങ്ങള്‍ യൂടൂബിലൂടെ പുറത്തുവന്നിട്ടുണ്ട്.
അതേസമയം, സംഭവ സ്ഥലത്ത് പരിശോധന നടത്താന്‍ യു.എന്‍ നിരീക്ഷകരെ അനുവദിക്കണമെന്ന് ബ്രിട്ടീഷ് വിദേശകാര്യ സെക്രട്ടറി വില്യം ഹേഗും ഫ്രഞ്ച് പ്രസിഡന്‍റ് ഫ്രാങ്കോയിസ് ഹൊളണ്ടും ആവശ്യപ്പെട്ടു. അറബ് ലീഗും നിരീക്ഷകരെ അനുവദിക്കണമെന്ന് ആവശ്യപ്പെട്ടു.
Follow our blog on Twitter, become a fan on Facebook. Stay updated via RSS