ഇതിഹാസത്തിന്റെ ആദ്യ സെഞ്ചുറിക്ക് 23 വയസ്സ്
By smug - Thursday, 15 August 2013
മുംബൈ: സെഞ്ചുറികളുടെ രാജകുമാരന്‍ സച്ചിന് തെണ്ടുല്‍ക്കറുടെ ആദ്യത്തെ അന്താരാഷ്ട്ര സെഞ്ചുറിക്ക് ആഗസ്ത് 14ന് 23 വയസ്സ് തികയുന്നു. 1990 ല്‍ ഇംഗ്ലണ്ടിനെതിരെ ഓള്‍ഡ് ട്രഫോര്‍ഡിലായിരുന്നു 17 കാരന്‍ സച്ചിന്റെ കന്നി സെഞ്ചുറി. വരാനിരിക്കുന്ന സെഞ്ചുറിപ്പെരുമഴയുടെ സൂചനകള്‍ നല്‍കി കൗമാരകാലത്ത് സച്ചിന് കളിച്ച ഈ ഇന്നിംഗ്‌സ് കരിയര്‍ ബെസ്റ്റുകളില്‍ ഒന്നായാണ് കരുതപ്പെടുന്നത്. 109 ന് നാല് എന്ന നിലയിലായിരുന്നു സച്ചിന് അന്ന് ക്രീസിലെത്തിയത്. തോല്‍വിയുറപ്പിച്ച കളിയില്‍ പുറത്താകാതെ 119 റണ്‍സെടുത്ത സച്ചിന് ഇന്ത്യയ്ക്ക് നേടിക്കൊടുത്തത് വിജയത്തോളം പോന്ന സമനില.
ഇന്ത്യയുടെ ബാറ്റിംഗ് നിര തകര്‍ന്നടിയുമ്പോഴായിരുന്നു സച്ചിന്റെ ആദ്യസെഞ്ചുറി എന്നത് ഒരു അത്ഭുതമല്ല. പിന്നീട് ഏറെക്കാലം ക്രിക്കറ്റ് ആരാധകര്‍ ഇന്ത്യന്‍ ബാറ്റിംഗ് സമം സച്ചിന് എന്ന് വായിച്ചുതുടങ്ങിയതിന്റെ തുടക്കം മാത്രമായിരുന്നു അത്. നവ്‌ജ്യോത് സിംഗ് സിദ്ദു (0), രവി ശാസ്ത്രി (12), മഞ്ജരേക്കര്‍ (50), വെംഗ്‌സര്‍ക്കര്‍ (32) എന്നിങ്ങനെയായിരുന്നു സച്ചിന് സെഞ്ചുറി തികച്ച കളിയില്‍ മറ്റുള്ളവരുടെ പ്രകടനം. 17 വയസ്സും 112 ദിവസവുമായിരുന്നു സെഞ്ചുറി തികയ്ക്കുമ്പോള്‍ സച്ചിന് പ്രായം. ലോകറെക്കോര്‍ഡുകാരന്‍ മുഷ്താഖ് അഹമ്മദിനെക്കാള്‍ വെറും ഒരു മാസത്തിന്റെ മൂപ്പ്. 23 കൊല്ലം നീണ്ട കരിയറില്‍ തുടര്‍ന്നിങ്ങോട്ട് സെഞ്ചുറികളുടെ പ്രവാഹമായിരുന്നു. ടെസ്റ്റിലും ഏകദിനത്തിലുമായി സച്ചിന് അടിച്ചുകൂട്ടിയ സെഞ്ചുറികളുടെ എണ്ണം മാത്രം വരും മറ്റൊരു സെഞ്ചുറി.
Follow our blog on Twitter, become a fan on Facebook. Stay updated via RSS